ភាពទំនាក់ទំនងរវាងមនុស្សនិងយានយន្តគឺមានជាយូរយារមកហើយ។ យើងចាំឡានដំបូងរបស់យើង, ដំណើរការនៃការទទួលបណ្ណបើកបរ, ដំណើរដ៏អស្ចារ្យ និងការប៉ះទង្គិចនានា។ ទំនាក់ទំនងនេះមានភាពស្របគ្នាខ្លះជាមួយអាជីពរបស់យើងក្នុងសេវាហិរញ្ញវត្ថុ។ យើងចាំភ្ញៀវដំបូងរបស់យើង, ដំណើរការនៃការទទួលអាជ្ញាបណ្ណនិងព័ត៌មានអត្តសញ្ញាណ, ការលក់សំខាន់ៗ ព្រមទាំងការទទួលរងខ្លះៗនៅតាមផ្លូវ។

ភាពស្របគ្នានេះគឺមានកាន់តែជ្រៅដែរ នៅពេលយើងគិតលើឯកសិទ្ធិនិងការទទួលខុសត្រូវពាក់ព័ន្ធជាមួយការបើកឡាននិងការស្វះស្វែងក្នុងវិជ្ជាជីវិៈរបស់យើង។ ការបើកបរនាំឲ្យបើកចំហឱកាសធ្វើដំណើរទៅទីកន្លែងថ្មីៗ រីឯការបម្រើការជាអ្នកប្រឹក្សាហិរញ្ញវត្ថុអនុញ្ញាតឲ្យយើងជួយអ្នកដទៃឲ្យឈានដល់ទីគោលដៅរបស់ពួកគេ។ បើយើងឃ្លាតចាកពីការអនុវត្តការបើកបរប្រកបដោយការទទួលខុសត្រូវ អ្នកអនុវត្តច្បាប់ឈរត្រៀមជាស្រេចដើម្បីផាកយើង។ បើយើងងាកចេញពីការប្រកាន់ខ្ជាប់តាមស្តង់ដាសីលធម៌និងកាតព្វកិច្ចច្បាប់ក្នុងជីវិតវិជ្ជាជីវៈរបស់យើង មានអង្គភាពអនុវត្តបទបញ្ញត្តិដែលបានចាត់តាំងឡើងដើម្បីថ្លែងពីរឿងនេះ។ យើងទាំងអស់ចង់ឲ្យកំណត់ត្រានៃការបើកបររបស់យើងនៅស្អាតល្អ តាមរយៈការប្ដេជ្ញារក្សាសុវត្ថិភាព ហើយចង់ឲ្យកំណត់ត្រានៃការគោរពច្បាប់របស់យើងល្អឥតខ្ចោះ តាមរយៈការប្ដេជ្ញារក្សាភាពស្មោះអស់ពីបេះដូងចំពោះភ្ញៀវរបស់យើង។

ដើម្បីធ្វើឲ្យភាពស្របគ្នាទាំងនេះទៅកាន់តែឆ្ងាយ ឱវាទចំនួនប្រាំឃ្លា ដែលជាក់ស្ដែង គ្រូបង្រៀនការបើកបរបានផ្ដល់ឲ្យ គឺជាប់ទាក់ទងយ៉ាងជិតដឹតនឹងឥរិយាបថនិងសកម្មភាពប្រកបដោយសីលធម៌របស់យើងក្នុងនាមជាអ្នកប្រឹក្សាហិរញ្ញវត្ថុ។

1. សម្លឹងមើលផ្លូវខាងមុខឲ្យបានឆ្ងាយ។ ពាក្យទាំងនេះកត់សម្គាល់ពីការអនុវត្តដ៏សំខាន់នៃការបើកបរដោយសុវត្ថិភាព។ ការមើលផ្លូវបានល្អមិនបង្អាក់ប្រតិកម្មរហ័សចំពោះស្ថានការណ៍ទាំងឡាយភ្លាមៗនៅខាងមុខយើងទេ; ខួរក្បាលនិងភាពតបតយ៉ាងឈ្លាសវៃរបស់យើងនឹងធ្វើរឿងទាំងនេះយ៉ាងរហ័ស។ ប៉ុន្តែការផ្ដោតចំណាប់អារម្មណ៍តែលើអ្វីដែលនៅចំពោះមុខយើងតែម្ដង នឹងខ្ទប់លទ្ធភាពរបស់យើងក្នុងការប្រមើលមើលបញ្ហាដែលអាចកើតឡើង ឬក៏ការតបតដែលចាំបាច់នៅលើដងផ្លូវ។ ភាពទំនាក់ទំនងដែលបានបង្កើតជាមួយភ្ញៀវតម្រូវឲ្យមានទស្សនវិស័យប្រភេទស្រដៀងគ្នានេះដែរ។ យើងកំពុងមានភាពទំនាក់ទំនងក្នុងចម្ងាយផ្លូវដ៏វែងឆ្ងាយ ដូច្នេះចំណាប់អារម្មណ៍មិនគួរនៅនឹងថ្កល់លើការលក់ភ្លាមៗ ឬក៏ផលិតផលថ្មីៗឡើយ ប៉ុន្តែត្រូវមើលលើគោលបំណងដែលភ្ញៀវបានបញ្ជាក់និងសុខុមាលភាពនាពេលអនាគត។

2. បង្កើតទម្លាប់បើកបរល្អ។ ទម្លាប់បើកបរល្អចាប់ផ្ដើមនៅពេលអ្នកចូលរថយន្ត៖ ពាក់ខ្សែក្រវាត់, លៃតម្រូវកញ្ចក់, ពិនិត្យមើលចង្កៀងពន្លឺនិងកុងទ័រ។ នៅពេលយើងមិនខកខានធ្វើរឿងទាំងនេះ យើងនឹងបើកបរលើដងផ្លូវក្នុងលក្ខណៈយ៉ាងមានសុវត្ថិភាពតាមដែលអាចធ្វើបាន។ ទម្លាប់រក្សាសុវត្ថិភាពនិងគោរពច្បាប់ក្នុងវិជ្ជាជីវៈរបស់យើងក៏គួរចង្អុលឲ្យយើងបង្កើតទម្លាប់ជាប្រចាំនិងធ្វើអ្វីៗយ៉ាងខ្ជាប់ខ្ជួនផងដែរ។ បន្ទាប់មក បើមានសំណួរ យើងអាចនិយាយជាមួយការជឿជាក់ថា នេះជាអ្វីដែលយើងតែងធ្វើក្នុងស្ថានការណ៍នេះ ហើយយើងមានឯកសារភ្ញៀវដែលបានរក្សាទុកតាមទម្លាប់ជាប្រចាំ។

ដងផ្លូវមានគ្រោះថ្នាក់របស់វា។ ដូចគ្នានេះដែរ បរិស្ថានប្ដឹងផ្ដល់បង្ហាញយើងនូវហានិភ័យនៅតាមផ្លូវក្នុងជីវិតវិជ្ជាជីវៈរបស់យើង។ វិធីល្អបំផុតក្នុងការធ្វើដំណើរទៅមុខយ៉ាងមានសុវត្ថិភាពគឺរក្សាគ្រប់ឯកសារ មិនថាឯកសារជាសន្លឹកក្រដាស ឬជាទ្រង់ទ្រាយអេឡិចត្រូនិកដែលមានសន្តិសុខទេ។ ទម្លាប់ជាប្រចាំ។ ការរក្សាឯកសារ។ ពេលខ្លះ ទាំងនេះអាចគួរឲ្យហត់នឿយ ប៉ុន្តែពួកវាពិតជាចាំបាច់ដាច់ខាត។

3. ស្គាល់យានជំនិះរបស់អ្នក។ នៅពេលយើងស្គាល់ឡានកាន់តែច្បាស់ — អ្វីៗដែលចេះតែកើតឡើងបន្តិចម្ដងៗ — យើងកាន់តែដឹងច្បាស់ថាវានឹងបើកទៅយ៉ាងម៉េច នៅពេលជាន់បង្ខំ, វាមានសំឡេងយ៉ាងម៉េចនៅពេលប្រឹងអស់, ភាពប្រតិបត្តិនិងដែនកំណត់របស់វា។ ចំណាប់អារម្មណ៍របស់យើងក្នុងការស្គាល់ពីយានជំនិះរបស់យើង នឹងជួយឲ្យយើងថែទាំវាយ៉ាងវាងវៃនិងទទួលសក្ដានុពលរបស់វាជាអតិបរមា។

ក្នុងនាមជាអ្នកមានវិជ្ជាជីវៈហិរញ្ញវត្ថុ យើងត្រូវការស្គាល់ភ្ញៀវរបស់យើងឲ្យច្បាស់បំផុត។ ដំណើរការចង់ដឹងក្នុងលក្ខណៈតែមួយដែលនាំឲ្យអ្នកប្រើប្រាស់យានយន្តម្នាក់កាន់តែវាងវៃ គួរជាបទដ្ឋានក្នុងការទាក់ទង/វាយតម្លៃភ្ញៀវថ្មីម្នាក់។ តម្រូវការ, ក្ដីសង្ឃឹម, ការភ័យខ្លាច និងគោលបំណងនៅទីបំផុតរបស់ភ្ញៀវគ្រប់រូបគឺជាអ្វីមួយដែលយើងគ្រប់គ្នាគួរដឹង — ហើយអ្វីៗទាំងអស់ដែលយើងដឹងគឺជាព័ត៌មានឯកសិទ្ធិពិតប្រាកដ។ ក្នុងនាមជាអ្នកមានវិជ្ជាជីវៈ យើងត្រូវទទួលយកក្រមនៃភាពសម្ងាត់ដែលបានអនុវត្តដោយក្រុមប្រណាងយានយន្ត — គ្មានពេលណាមួយដែលយើងត្រូវបញ្ចេញព័ត៌មានអំពីការតុបតែង ការគ្រប់គ្រង លក្ខណៈប្លែក ឬសក្ដានុពលនៃឡាន ឬក៏ភ្ញៀវឡើយ។

4. មិនត្រូវបើកបរពេលញាណចុះខ្សោយឬមិនមូលអារម្មណ៍ឡើយ។ តាមផ្លូវច្បាប់ ការបើកបរឡាន ខណៈពេលកំពុងមានជាតិពុលក្នុងខ្លួនអាចនាំឲ្យមានហានិភ័យនៃការពិន័យ ដែលច្រើនតែធ្ងន់ធ្ងរ។ តាមលក្ខណៈសីលធម៌ អាកប្បកិរិយានោះឆ្លងហួសព្រំដែនសីលធម៌ ដោយធ្វើឲ្យអ្នកដទៃមានហានិភ័យ។ ក្នុងឧស្សាហកម្មរបស់យើង ទំនាក់ទំនងជាមួយភ្ញៀវត្រូវបានចាត់ទុកថាចុះអន់ខ្សោយ បើមានការច្របូកច្របល់អំពីប្រាក់ ឬក៏បើផលិតផលត្រូវបានបង្ហាញខុស។ សកម្មភាពណាក៏នាំឲ្យមានផលវិបាកតាមផ្លូវច្បាប់និងការស្ដីបន្ទោសពីផ្នែកអនុវត្តបទបញ្ញត្តិដែរ។

ការបើកបរមិនមូលអារម្មណ៍ — ការផ្ញើសារឬឆាតតាមទូរសព្ទ ហាក់ដូចជាមានគ្រោះថ្នាក់តិច។ ការសិក្សាបង្ហាញថា វាមិនអញ្ចឹងទេ ហើយអ្នកវិទ្យាសាស្ត្រខាងសរសៃប្រសាទប្រាប់យើងថា ខួរក្បាលរបស់យើងមិនអាចផ្ដោតអារម្មណ៍ទាំងមូលលើរបស់ពីរក្នុងពេលតែមួយឡើយ។ ក្នុងវិជ្ជាជីវៈរបស់យើង ការមិនមូលអារម្មណ៍អាចបង្កគ្រោះថ្នាក់ដល់ជីវិតនៃភាពទំនាក់ទំនងរវាងភ្ញៀវ-អ្នកផ្ដល់សេវា។ ការបម្រើភ្ញៀវរបស់យើង គ្រប់ទំនាក់ទំនងនិងគ្រប់បរិការណ៍ ទាមទារនូវចំណាប់អារម្មណ៍ពេញលេញនិងការផ្ដោតអារម្មណ៍តែមួយ។ ការមិនមូលអារម្មណ៍អាចជៀសវាងបានដោយការមានផែនការនិងការអនុវត្តឲ្យមានរបៀបរៀបរយទាំងស្រុង ចាប់ពីការមានបញ្ជីពិនិត្យនៃឯកសារផ្សេងៗ ដល់ការថែទាំការិយាល័យឲ្យមានសណ្ដាប់ធ្នាប់ទាំងស្រុង។

5. រៀនពីច្បាប់, ស្លាកសញ្ញា និងវិធានចរាចរណ៍លើដងផ្លូវទាំងអស់ ហើយមិនត្រូវសន្មតថាអ្នកមិនអាចក្លាយជាអ្នកបើកបរល្អប្រសើរទេ។ នៅពេលយើងបើកឡាន វាសំខាន់ចំពោះយើងដែលត្រូវដឹងរឿងទាំងនោះ ដូចជាផ្លូវខាងណាដែលត្រូវបើកលើនោះ, ថាល្បឿនត្រូវបានដាក់ជាម៉ាយល៍ឬគីឡូម៉ែត្រ ព្រមទាំងភ្លើងសញ្ញាពណ៌លឿងលោតភ្លឹបភ្លែតមានន័យថាម៉េច។ ច្បាប់និងស្លាកសញ្ញាខុសគ្នាពីរដ្ឋមួយទៅរដ្ឋមួយ ពីប្រទេសមួយទៅប្រទេសមួយទៀត ដូច្នេះយើងត្រូវតែដឹងថាមួយណាដែលអនុវត្ត នៅពេលយើងកំពុងបើកបរ។ នៅក្នុងឧស្សាហកម្មរបស់យើង យើងត្រូវបង្កើតភាពដឹងច្បាស់ទាំងស្រុងលើច្បាប់និងបទបញ្ជាជាប់ទាក់ទងទាំងអស់ក្នុងតំបន់ដែលយើងបម្រើសេវា។ ដូចនឹងការកាន់បណ្ណបើកបរដែលតម្រូវឲ្យយើងដឹងទិន្នន័យមួយចំនួនធំ ការកាន់អាជ្ញាបណ្ណ/វិញ្ញាបនបត្រវិជ្ជាជីវៈក្នុងឧស្សាហកម្មរបស់យើងក៏តម្រូវឲ្យយើងមានចំណេះដឹងពេញលេញនិងទាន់សម័យអំពីទិន្នន័យសំខាន់ៗមួយចំនួនធំដែរ។ ឯកសិទ្ធិនៃការបើកបរធ្វើឲ្យយើងគោរពតាមស្តង់ដានៃការទទួលខុសត្រូវ ដូចគ្នានឹងឯកសិទ្ធិនៃការបម្រើភ្ញៀវរបស់យើងដែរ។

យើងតែងតែអាចក្លាយជាអ្នកបើកបរដ៏ល្អប្រសើរម្នាក់។ ពីគ្រប់បទពិសោធន៍លើដងផ្លូវ យើងអាចរៀនពីរបៀបប្រមើលមើលបញ្ហា, របៀបគ្រប់គ្រងយានជំនិះរបស់យើងល្អបំផុត ព្រមទាំងរបៀបប្រើបច្ចេកវិទ្យាយានយន្តថ្មីៗ។ យើងក៏តែងតែអាចក្លាយជាអ្នកផ្ដល់សេវាដ៏ល្អប្រសើរម្នាក់ដែរ។ បទពិសោធន៍ផ្ដល់ដំណឹងឲ្យយើង ប៉ុន្តែយើងក៏ត្រូវតែបុរេសកម្មក្នុងការទាញប្រយោជន៍ពីឱកាសអប់រំផងដែរ ដើម្បីរៀនឲ្យបានស៊ីជម្រៅថាតើឧស្សាហកម្ម, ក្រុមហ៊ុនជាច្រើន និងផលិតផលកំពុងដំណើរការយ៉ាងដូចម្ដេច។

កត់សម្គាល់បញ្ចប់៖ អត្ថបទនេះមានការយោងទៅគោលការណ៍ជាច្រើន, គោលជំនឿ និងតម្រូវការដែលមានក្នុងក្រមសីលធម៌ MDRT។ វាពិតជាមានតម្លៃក្នុងការពិនិត្យក្រមនេះដែលមាននៅ mdrt.org ដោយចាត់ទុកថាជាផ្នែកដ៏សំខាន់នៃការជំរុញយើងឲ្យសម្រេចបាននូវការគោរពច្បាប់ពេញលេញនិងជោគជ័យជាបន្តបន្ទាប់នៅក្នុងវិជ្ជាជីវៈរបស់យើង។

Search

Search

ការជម្រុញដល់ការគោរពច្បាប់ និងភាពជោគជ័យ